20250712 - Carraig Eibhlín go dtí Cé Doirín an Chairn (Zetland)

Bhí an imeacht snámha "Gadding About Garnish" ar siúl tráthnóna, agus d'eagraigh Dave Elwood go dtiocfadh cadhcóirí ó fud fad an contae chun tacaíocht.
Chinneamair in WCKC go ndéanfaimis turas beag deas roimh ré. Chruinníomair ag Carraig Eibhlín ar maidin, agus as go brách linn!

Chuamair ó dheas agus ansin siar ó dheas i dtreo Oileán Síolán.

Tar éis dul timpeall sin cúpla uair, chuamair i dtreo an cé ag Doirín an Chairn. Tugtar "Zetland" ar an gcé seo, ach níl cliú dá laghad agam canathaobh.

Bhí lón breá againn ann. De seans ait, bhí maróg Nollag agam le roinnt, agus bhí císte Nollag ag Robert le roinnt freisin. Cheapamair go raibh an comhtharlú san fíor greannúir, ach nuair a thóg Pa uachtar reoite amach as mála fuair, le roinnt eadrainn freisin, bhí ionadh an domhain orainn!

Ar an slí ar ais, nuair a bhíomair i ngar le Illaunthieve, chonaiceamair rudaí aite ar na carraigeacha cois farraige. Nuair a bhíomair ní ba ghiorra leo, thugamair fé ndeara gur gabhair a bhí iontu.

Thógamair ár gcuid ama ag filleadh ar ais go Carraig Eibhlín, agus chuamair timpeall Oileán an Chuilinn ar an slí.

Bhí an t-ádh dearg orainn an gearrcach iolair ar an nead i gcrann in aice an cladach.

Ní ba dhéanaí, do chonac an tuismitheoir ag eitilt os cionn an oileán, agus ag sitheadh anuas.

Bhí gliondar ar mo chroí é sin a fheiscint.

Nuair a bhíomair ag fanacht le tús an rás, chuas timpeall an oileán uair amháin eile.

Seo thíos físeán Pa ón lae.

20250701 - Cloch Dábhiolla agus Oileán Sionnaigh

Bhíos ag dul go BAC díreach tar éis an cruinniú ISKA i gContae an Chláir, agus bhíos chun a bheith ann ar feadh beagán lae, agus bhí an dá chadhc agam ar dhíon an veain, dar ndóigh.

Bhíos i dteagmháil le cúpla céaslóirí in ECSKC, agus scaipeadar an scéal go raibh suim agam dul amach go Cloch Dábhiolla.
Tháinig Mick O'Farrell ar ais chugam go dtiocfadh sé amach liom, agus shocraíomair an coinne. Dúirt sé go mbeadh a chara Mark Clinton ag teacht linn freisin.

Chuamair amach as Loch Sionnaigh, agus chomh luath is a chuamair timpeall an ceann cé bhí an oileán soiléir le feiscint. Bhí sí ní ba ghiorra ná a bhíos ag súil.

Mar is gnách dul amach go dtí teach solais, ar dtús mothaíonn sé ná fuil tú ag éirí níos gaire ar chor ar bith, ach de réir a chéile bíonn tú in ann níos mó mion-sonraí a fheiscint ar an oileán, agus go tobann bíonn tú ann!

Ón bhfad seo, bhí torann agus gleo na geabhróige rósach le clois go hard.

Is aít rí-thábhachtach í seo le haghaidh na héiníní gleoite seo, agus ní rabhas ar iarraidh cuir isteach ortha an iomarca. Raghfainn timpeall an dá oileán go tapaigh, ach ní bheinn ag dul i dtír in aon chor.

Mark ar chlé, mise ar dheis.

Mark agus Mick.

Ar an slí ar ais, chinneamair dul timpeall Oileán Sionnaigh, agus stopamair ann ar feadh tamall le haghaidh greim bídh.

Turas gairid deas a bhí ann, agus bhí sé an-deas bualadh le cadhcóir chomh inniúil (agus mór le rá) is atá Mick. Bhí sé go deas bualadh le Mark freisin. Bhí sé soiléir dom go raibh sé fíor oilte mar cadhcóir, ach ní raibh a fhios agam go raibh ról chomh tábhachtach in CI aige tráth.
Bhí orm dian-iarracht a dhéanamh an t-am ar fad coimeád suas leo, ach dúshlán maith a bhí ann.

Seo thíos mo fhíseán ón dturas.