20231115 - Ag siopadóireacht.

Táim san Ísiltír fé láthair ar cúpla chúrsa oiliúna, ach inniu bhí lá sosa agam idir an da cheann.

Chuas ar Facebook inne, agus d'fhiafraigh mé de mo "chairde" cad atá le déanamh gar le Amsterdam ag an gcuid seo den bhliain.
Tháinig an-chuid moltaí maithe ar ais. Tá cuid acu déanta agam cheanna féin, agus cuid eile deacair le heagrú ar an bpointe boise, ach dtáinig moladh amháin ná rabhas ag súil leis, ó David Horkan. Dúirt sé go bhfuil an siopa ar son na spóirt céaslú is mó sa Eoraip in aice Amsterdam, agus níl sé ach turas traenach gairid lena bhaint amach.

Dheineas suas mo intinn ar an spota - raghfad go dtí Kanocentrum Arjan Bloem lena feiscint (ach ní cheannóinn aon rud).

An chéad rud le rá ná, ní raibh sé chomh éasca sin dul ann, ach bhí sé fiú é.

Níor chonac a leithéid de áit agus seo riamh. Bhuel, b'fhéidir a leithéid, ach ní a méid. Tá an áit seo mór millteach.

Cadhcanna ar fud na háite...

...lasmuigh...

...agus laistigh...

...idir sean...

...agus nua.

Ghlacas an deis féachaint ar na haistí-lae tosaigh atá ag roinnt de na cadhcanna anseo. Is é an haiste-lae tosaigh an gné is measa de mo Romany, agus bhíos fiosrach conas atá siad deartha agus feistithe ar cadhcanna eile.

Seachas na báid áille a bhí ann, bhí gach saghas trealamh agus éadaí ann freisin, agus tharraing cúpla rud m'aird.

An fhirinne a rá, ní rabhas in ann an áit a fhágáil gan cúpla rud a cheannach, ach ar a laghad, níor cheannaíos ach cúpla smeachnasc...agus gaisce mór a bhí ann...measaim!

20231108 - Cuan Dor go dtí Tráigh an Choinicéir

Leis an méid cleachta atá déanta agam le déanaí le haghaidh an L4, bhíos ag súil go mór le dul amach ar gnáth-aistear, gan a bheith ag snámh agus a leithéid!
Bhí an t-ádh dearg orm go raibh Joe Quinn saor inniu, agus turas ar an intinn ag an mbeirt againn.

Chuamair amach ó Cuan Dor agus chasamair soir ag Rinn an Ghabhair agus tharr Trá Long. Bhí orainn coinnigh amach ón gcósta mar gheall ar an tsuaill mór ag teacht isteach aniar aneas.

Bhí sé breá ciúin laistigh in Mill Cove nuair a chuamair isteach le haghaidh sos beag. Is álainn an cuan é, agus seo mo chéad uair ann.

Nuair a shriochamair An Coinicéar, bhí bruth beag ag rith ann, ach ní raibh fonn surfála orm.

Turas gairid a bhí ann, ach le comhluadar breá, agus iontas na tonnta móra ann i gcónaí. An-spraoi ar fad, agus cupán deas té ag an deireadh againn.

20231105 - Measúnacht Oiliúnt Leibhéal 4.

Le tamall anuas, do bhíos ag scealpadh amach ag an Leabhar Taifead Oiliúint Cadhcáil Mara Leibhéal a Ceathair de réir a chéile. Dheineas píosaí le Jon Hynes ag cruinnithe ISKA mar shampla, agus nuair a dtáinig na cuairteoirí ón Íorua.

Ní raibh ach méid beag le críochnú, agus tá Dave Elwood agus Pa Conway sa chás chéanna,

Shocraíomair le Jon seisiún measúnú a dhéanamh, chun gach rud a chríochnú, ach ag an deireadh, ní raibh Pa in ann teacht inniu.

Bhuaileamair le Jon ag Caladh an tSeancheann, agus amach linn.

An gnáth pleidhcíocht a bhí i gceist - leaindeáil snámha ar carraigeacha, muir-eolas, féin-sábháil, tarraingt ar cheann téide srl.

Ag deireadh na dála, d'éirigh liom an próifíl a chríochnú, ach bhí cúpla rud fós le déanamh ag Dave.

Táim sásta go bhfuil sin déanta agam, agus táim fíor buíoch as Jon as an tacaíocht a thug sé dom i rith an próiséis.

20231022 - Traenáil Leibhéal a Ceathair, mar chuid de Measúnacht Teagascóirí Leibhéal a Ceathair.

Thug Jon Hynes cuireadh do dream beag ón gclub teacht le bheith mar 'Guinea-pigs' do grúpa atá á mheas ag Canoeing Ireland mar teagascóirí leibhéal 4.

I measc an slua, bhí Dave Elwood, Amy Walsh, Niall Leahy, Pa Conway, Joe Quinn agus Ronan O'Brien. Ársaí urrúnta sa chlub, gach duine acu.

Bhuaileamair le chéile in Conamar, agus bhriseadh suas in dhá ghrúpa sinn (bhí daoine eile ann, ná raibh aithne againn ortha), agus chuamair amach le triúr iarrthóir agus beirt mheasúnóir araon.

Ar dtús bhíomair ag déanamh rudaí fíor bunúsach, agus bhíomair buartha go mbeadh an lae beagáinín leadránach, ach sara fada bhí athrú mór ar an scéal.

D'aimsaíomair góilíneach taobh theas Oileán Uí Drisceoil leis an mórtas farraige ag teacht isteach tríd, agus bhí sé in am píosa carraig-preabadh a dhéanamh!
Ó, an-spórt a bhí ann. De gnáth, leis na dálaí a bhí ann, bheinn beagán drogallach dul chomh gar leis na carraigeacha, ach leis an gcomhluadar sin, bhíos ní ba chróga ná gnáth!

Amy ag cleachta an rolla sna dálaí. Bhí sí ní ba chróga na mé.

Ina dhiaidh san, leanamair ar aghaidh go dtí Inis Arcáin, agus Trá Airgid. Bhí na tonnta ag teacht díreach isteach ar an dtráigh, agus bruth deas glan ann dá bhrí sin.

Bhí seisiún den scoth againn, agus rud is iontaí dá bhfaca mé ná, David Horkan ag surfáil ar chúl, ag tumadh deiridh a bhád go domhain sa tonn, ag déanamh fiodrince leis an mbád ceartingearach san aer, ansin ag leaindeáil ar an dtonn, agus ag leanúint ar aghaidh ag surfáil ar an dtonn ceannann céanna. 🤯

Tar éis an surfáil, bhí sos lóin againn. Chuamair ar ais go dtí Conamar ansin, ag déanamh rudaí beaga ar an slí.

Lá den scoth a bhí ann. Traochta ach sásta, chuamair go dtí Spar ar Bhóthar Chorcaí sa Sciobairín, agus bhuaileamair le Jon Hynes ann. Shínigh sé níos mó d'ár leabhair L4, agus bhíomair fíor sásta leis an lae ansin!

Ba é Jon a ghlac na fótagraif ar an uisce inniu freisin.

20231006 - 20231008 - ISKA Siompóisiam - Neidín.

Is é an chuid sin den bhliain arís - an siompóisiam ISKA, ach i mbliana, tá sé an-ghar linn in Neidín.

De hAoine tháinig mé san iarnóin, agus chuaigh dream maith againn amach fé stiúir Susan Honan.

Bhí an-chuid craic agus bídh 'is dí an oíche sin freisin. Ta an cuma ar an scéal go bhfuil leath de WCKC anseo i Neidín le haghaidh an deireadh seachtaine.

Bhí téama ann den siompóisiam i mbliana - Bain Triail As Rud Nua.

Ag cloí leis an spiorad san, ar an Satharn thriail mé as surfski den chéad uair. Bhí ceardlann eagraithe agus treoirithe ag Seán Cahill, agus bhí sé an-spraoi, agus níos éasca ná a shíl mé.

Ina dhiaidh sin, bhí orm tiomáint chomh tapaigh agus ab fhéidir timpeall ó caladh Blackwater i nDoirín an Phoill go dtí Cill Mocheallóg le haghaidh seisiún muir-eolas praiticiúil treoirithe ag Geo O'Callaghan..

De Domhnach bhíos ag déanamh ceardlann bainistithe theagmhais le Jon Hynes i gCill Mocheallóg arís. Ceardlann fíor suimiúil a bhí ann, agus cúpla rud eile sínithe i mo Leabhar Oiliúint Leibhéal a Ceathair.

Jon Hynes

Deireadh seachtaine lán a bhí ann, ach lán le spórt agus spraoi agus foghlaim. Ar fheabhas!

20230930 - 20231001 - An Bhearú - Pure Adventure.

Táim ag logáil ama teagascaíochta le haghaidh an Bronnadh Teagascóir Canú, Leibhéal 2, fé láthair, agus ag an deireadh seachtaine  bhí deis agam dul le Phil McCormack ó Pure Adventure. Tá an comhlacht bunaithe i nGráig na Manach ar An mBearú, agus is álainn an áit í.

Bhí grúpa tagtha ó BAC le haghaidh cúrsa oiliúint leibhéal a dó, agus bhíos ag cabhrú le Phil iad a traenáil. Mar a tharla, bhí aithne agam ar cuid maith acu cheanna - cadhcóirí maithe iad ón gcósta oirthear. Tá cliú agus cáil ar Susan Honan (i measc an pobal céaslú in Éireann), agus Brian agus Marie ó Shearwater Sea Kayaking.
Ar an Satharn, bhíomair ag Clais Ghainimh, ag déanamh buillí simplí agus beagáinín briseadh isteach is amach as sruth mall.

Ach inniu, bhí Phil diongbháilte an grúpa a thógaint ar turas síos an abhann, agus nach mór an spraoi a bhí ann!

Ar chúl - Tony Hawkridge, Phil McCormack, Brian, mise.
Chun tosaigh - Niamh Kenny, Sue Honan, Marie.
(agus daoine eile nach iad!)

Ag deireadh an lae, thug Phil an bronnadh oiliúint canú leibhéal a trí dom. Táim fíor buíoch as, agus fuaireas a lán níos mó as an dá la ná a bhíos ag súil ag an dtús.

20230821 - Teagascóireacht

Is teagascóir anois mé, de réir cosúlachtaí.

Mo mhíle buíochas do gach teagascóir a thug a gcuid ama dom le haghaidh am a logáil: Donncha O'Brien, Martin Duffy, Jim Kennedy, Sea Pierce & Eileen Murphy, agus Colin Wong, dar ndóigh, as an measúnacht inniu.

Comhghairdeas freisin do Anna agus Dublin Michael a bhí in éindí liom inniu.

Próiséis fada agus daor a bhí ann, agus fós níl ach leibhéal a dó agam.

20230819&20 - Turas campála, Bá Bheanntraí.

Le linn an seachtain saoire sa Bhuailtín, bhí súil amháin agam ar an réamhaisnéis i gcónaí. Bhí an deireadh seachtaine seo curtha go leataobh míonna ó shin, agus mo chomrádaithe ag súil le turas campála, nú bheidís curtha as dom. Dúras leo míonna ó shin, "Muna bhfuil anfa ann, raghaimid ar thuras áit éigin". Ach cad a bhí ag teacht inár dtreo, ná stoirm uafásach - i lár an tSamhraidh.

   

An príomh aidhm a bhí againn ná aistear a dhéanamh timpeall na Blascaodaí, ach leis an réamhaisnéis seo, bheadh sin dodhéanta.

Chuaigh béal na stoirme tharainn oíche De hAoine, ach bhí sé le bheith gaofar go leor ar an Sathairn.

Tar éis an-chuid díospóireacht ar WhatsApp, chinneamair dul go dtí Bá Bheanntraí agus turas le cóir na gaoithe a dhéanamh ann. Níl an ceann scríbe sin chomh rómánsúil dúinne, ach is ar éigin atáimid in ann aon rud a dhéanamh leis an aimsir seo.

Chuireamair isteach san uisce ag Dún Baoi, gar le Baile Chaisleáin Bhéarra, agus ar dtús bhaineamair triail as dul amach tríd bhéal an chuan (idir An tOileán Mór agus an mórthír), ach bhí tonnta ollmhóra ag teacht isteach ón mbá. Chuamair fada a dhóthain chun taobh deisceart an oileáin a fheiscint, agus bhí sé breá soiléir go raibh sé ina scaobach ann, agus bhí orainn iompú thart agus déanamh i dtreo Cuan Bhéara.

Bhí an codarsnacht idir na dálaí sa chuan agus lasmuigh dochreidte. Bhí céaslóireacht deas éasca againn go dtí Lawrence Cove, agus a bhí lón againn ag an mbaile bhig Raerinn.

Raerinn.

Ronan O'Brien, mise, Aidan Murphy, Tess Glanville,
Jimmy Murphy, agus Joe Quinn leis an mburgar!

Cé go raibh an gaoth agus an fharraige ag laghdú go mall, diaidh ar ndiaidh, fós ní raibh sé ciúin nuair a bhaineamair Pointe an Longfoirt amach. Tar éis féachaint air ar feadh cúpla nóiméid, chinneamair leanúint ar aghaidh, agus bhí turas an-bríomhar, le cóir na gaoithe againn, thar an teach solais Róncharraig Mhór (gan deis ar bith stopadh chun féachaint), agus ar aghaidh go dtí Bá Trá Phraisce.

Teacht i ngar le Róncharraig Mór. Deacair fótagraf a ghlacadh sna dálaí seo.

Jimmy Murphy - breá compordach, mar is gnách.

Chuamair i dtír ag an gcaladh beag i dTrá Phraisce, agus d'aimsaíomair spota oiriúnach le campáil ann, cé go raibh sé beagán cruaidh.

Tar éis athrú éadaí tapa, shiúlamair an achar beag go dtí The Wild Atlantic Bar le féachaint ar an gcluiche rugbaí, agus beagán de sólaistí!
Nach iontach an comhtheagmhas a bhí ann go rabhamair ag campáil chomh gar leis an áit seo :)

Mise, Tess, Joe.

Bua Éire.

Ina dhiaidh sin, bhí sé in am dinnéar a dhéanamh, agus an tine champála a lasadh.

Maidin inniu (De Domhnaigh), bhí feabhas tagtha ar an aimsir, agus shocraíomair dul ar snámh arís.

Thógamair ár gcuid ama ag dul i dtreo Gleann Garbh, ag féachaint ar an tírdhreach agus an geografaíocht dhaonna na háite (mianadóireacht srl.).

Joe Quinn.

Joe, Ronan, Aidan, Tess.

Teacht isteach go Gleann Garbh.

Ag deiridh na dála, ceapaim gur bhain gach éinne sult as an aistear, in ainneoin an drochaimsir.

Agus ní mór dom a rá, ár míle buíochas do Joanne as sinn a phiocadh suas i nGleann Garbh agus a thabhairt ar ais go dtí Dún Baoi.