20220920 - An Pasáiste agus An Cóbh.

Fós ag staidéar i Rinn an Scidígh, bheartaigh mé dul amach tráthnóna inniu le Rob O'Brien agus Jimmy Murphy le haghaidh turas deas timpeall Cuan Chorcaí.

Thosnaíomair ag An bPasáiste, ó dheas go dtí Ród an Chóibh, agus ar ais in aice Baile an Mhanaigh.

Rob O'Brien.

Jimmy Murphy.

Tráthnóna deas eile ar an uisce a bhí ann, agus an-deas aithne ceart a chuir ar Rob.

20220918 - Ar ais go dtí Carraig Aonair.

Fuaireas scéala ó Dave Elwood go raibh sé chun triail ar Charraig Aonar ag an deireadh seachtaine, ar mhaith liom teacht leis, agus an bhfuil aithne agam ar éinne eile oiriúnach a bhfuil suim acu teacht? Cinnte ba mhaith liom teacht, agus bheadh Ronan lán ábalta leis an turas!

Ronan, mise, Dave, Toby.

Bíonn plean cliste ag Dave i gcónaí. D'imeodh muid ón Scoil, agus amach linn 10km trasna Loch Trasna go dtí Trá Chiaráin. Stopfaimis ann le haghaidh sos leithris agus greim bídh.

Ina dhiaidh sin, an plean ná dul amach 10km eile go dtí an carraig.

 

Agus sin a tharla!

Nuair a shroicheamair an carraig, bhí fonn ar Ronan agus Toby dul i dtír ann. Toisc nach raibh Donncha ann, chun an slí a thaispeáint, chinn siad ar teacht i dtír snámha a dhéanamh. Choimeád mise agus Dave na cadhcanna sábhála nuair a bhí siad san uisce agus ar an gcarraig.

Ní rabhas ag súil le beith ar ais anseo chomh luath ina dhiaidh mo chéad uair.

Agus plean Dave ag feidhmniú chomh maith go dtí seo, chloíomair leis. Nuair a bhíomair críochnaithe ar an gcarraig, chéaslaíomair ar ais go dtí Trá Chiaráin le haghaidh an lón.

Toby.

Mo bhréagán nua!

Sin déanta, chríochnaíomair an lae leis an 10km deireanach ar ais go dtí An Scoil.

An fhirinne a rá, bhíos traochta fén am a bhaineamair an caladh amach. Agus cad a tharla díreach ag an am sin, na bhuaileamair le Jon Hynes agus an fhoireann ón OEC ag dul amach go dtí Trá Chiaráin le haghaidh béile.

Lá fada, ach an-sásúil a bhí ann.

20220915 - Rinn an Scidígh go dtí Rinn an Róstaigh le Ronan.

Le bád nua agam, táim fíor díocasach dul amach ann. Táim ar chúrsa oiliúna ag NMCI fé láthair, agus oibríonn Ronan O'Brien in Rinn an Scidígh freisin, tugann sé sin deis iontach beagán céaslóireacht a dhéanamh um tráthnóna, ó am go chéile.

Anocht, chuamair amach ó Gobby Beach (Trá Gobaigh?), trasna go dtí Dognose (Cnoc an Oirchéadaigh?), ar fad White Bay, agus ó dheas go dtí Rinn an Róistigh.

Bhí sé go breá bheith amuigh, gan ach an bheirt againn, ar tráthnóna chomh aoibhinn seo.

D'Fhilleamair ar ais, ag dul in aice Graball Bay, ach gan stopadh i mBun an Tábhairne.

Cé go bhfuil an tírdhreach tionsclaíoch seo an-difriúil ó mo ghnáth 'pháirc súgartha' in Iarthar Chorcaí, bhaineas an-taitneamh as an imeacht.